Балаҕан ыйын 6 күнүгэр Дүпсүҥҥэ элбэх дьон кыттыылаах улахан тэрээһиннэр буолан аастылар.

Ол курдук, биир дойдулаахпыт, Россия художниктарын, суруналыыстарын, суруйааччыларын чилиэнэ, Саха өрөспүүбүлүкэтин искусстволарын үтүөлээх диэйэтэлэ, Бочкарев Василий Васильевич бэйэтин бииргэ төрөөбүттэрин уонна чугас аймахтарын түмэн быйыл сайын кинилэр аҕалара Бочкарев Василий Никитич туппут, ийэлэриниин элбэх оҕону төрөтөн, иитэн уһуннук, кэскиллээхтик олорбут кырдьаҕас дьиэлэрин өрөмүөннээн аныгылыы көстүүлээх гына оҥордулар уонна Василий Васильевич элбэх скульптурнай оҥоһуктарын туруоран дьоҥҥо-сэргэҕэ, ыччаттарга көрдөрөр быыстапканы аста, айар-тутар мастарыскыай оҥоһунна.

Бу дьиэ Дүпсүн бөһүөлэгэр биир кэрэ көстүүлээх, ыччаттары искусство эйгэтигэр уһуйар, иитэр-үөрэтэр суолталаах буоларга соруктанар. Саҥа объект аһыллыыта элбэх киһи мустуулаах, үөрүүлээх быһыыга-майгыга ааста.

Бу кэнниттэн мустубут дьон В. В. Никифоров-Күлүмнүүр аатынан музейнай комплекс иэнигэр тоҕуоруһан туран, Дүпсүн биллиилээх дьонун пааматынньыктарын аллеятыгар эмиэ В. В. Бочкарев оҥорбут икки пааматынньыгын: Дүпсүҥҥэ бастакы учуутал – Ушницкай П. А. уонна стустууга спорт маастара, учуонай Босиков Н. П. бюст-пааматынньыктарын үөрүүлээхтик аһыыны көрдүлэр, иһиттилэр.

Бу икки тэрээһиннэргэ Саха государственнай мунньаҕын Ил Түмэнин спикера Жирков А. Н. сылдьан кыттыыны ылбыта кинилэр суолталарын лаппа үрдэттэ. Жирков А. Н. бэйэтин этиилэригэр, уонна балаҕаҥҥа төгүрүк остуол быһыытынан олохтоохтору кытта көрсүүтүгэр Дүпсүн нэһилиэгэ инники сайдар боппуруостарыгар кэлэр 2016 сылга В. В. Никифоров-Күлүмнүүр төрөөбүтэ 150 сыла буолуохтааҕынан сибээстээн элбэх этиилэри оҥордо.

Буолбут тэрээһиннэргэ Россияҕа Үлэ Геройа, Улэҕэ Албан Аат медаллар толору кавалердара Готовцев Михаил Николаевич ыалдьыт быһыытынан ыҥырыллан сылдьыбыта кэрэхсэбиллээх буолла. Манна даҕатан эттэххэ М. Н. Готовцев оскуолаҕа аан бастаан Дүпсүн оскуолатын боруогун атыллаан “ньуул” кылааска үөрэнэ киирбитэ үгүс дьоннорго соһуччу үөрүү буолла. Улэ Геройа үгүстүк дьону кытта кэпсэттэ, ааҕарга-суруйарга үөрэппит бастакы учуутала Сивцева Евдокия Максимовна туһунан ахтыылары оҥордо, кэлбит дьону кытта элбэхтик хаартыскаҕа түстэ.

Тэрээһиннэр салгыы “Дүөндү” сынньалаҥ киинигэр, саҥа аһыллыбыт айар-тутар мастарыскыай дьиэтигэр киэһэ хойукка диэри ахтыы, ырыа-тойук арыаллаах буоллулар.

Бу улахан, үгүс дьон түмсүүлээх тэрээһиннэр биһиги биир дойдулаахпыт Бочкарев В. В. күн сирин көрбүтэ 70 сыллаах үбүлүөйүгэр анаан кини бэйэтэ үгүс сүүрүүтүнэн, үлэтинэн бардылар.

Василий Васильевич төрөөбүт Дүпсүнүн сиригэр өрүү ахсаабат кыһамнньытын уурар, кыһаллар, көмөлөһөр. Кини суруйар айымньылара, оҥорор скульптуралара, пааматынньыктара дойдутун сирин уотун киэргэтэллэр, историятын үйэтитэллэр, ыччаттарын үтүө өйгө-санааҕа, сиэрдээх буоларга иитэллэр.

Үбүлүөйүнэн сибээстээн Дүпсүн дьоно Василий Васильевичка өссө элбэх айымнньылары, айар мастарыскыайа сайдарыгар, тус бэйэтигэр үтүө доруобуйаны, оҕолоругар, сиэннэргэр дьолу-соргуну баҕараллар!

Аҕыйах хаартыскалар